यीशुरा का जन्म

मरियमैरी मगणी एकी यूसफ नांईऐरा एकी धर्मी पुरूषा सेईतै भुई।जां युसफा पता चला कि

मरियम दुपरांणी आ,कनै जै तैसैरै पैटा आ सै तैसैरू ना,ताम युसफै जै धैर्मी थ्या कनै सै तैस

बदनाम न काना चांन्था थ्या,तैसै चुपचाप त्यागणैरा विचार कया।जां सै ऐ गल सोचता थ्या त प्रभुरा स्वर्गदूत तैस सुपनै मझ लद्धा।

स्वर्गदूतै तैसनी बौलु,"हे यूसफ ।तू ऐपड़ी लैड़ी मरियमै ऐड़ी अंणना मझ मैई डरै,कैईनि कि जै

तैसैरै पैटा आ सै दवित्र आत्मइरी तरफ सेईतै आ।तैसॅ पुत्र जांमणा तैसैरू ना तऊ यीशु रखणु

कैईनी कि सै अपड़ै लौका कैरा उद्धार करैला।

युसफै मरियम सेईतै विवाह कया कनै अपड़ी कनै तै सेईतै लै या,कनै जां तैईनी तैसै पुत्र न जम्मा

सै तैसै कन न ग्या।

जां मरियमैरै जनणैरै दिह पुरै भुऐ,रोमन साम्राज्य बौलु कि सारै लौक ना लिखवाणैरै तैईनी अपड़ै

अपडै नगरांनी गाहा। युसफा कनै मरियमी बी अक लम्बी यात्रा तेय करि नासरत ग्यै,केईनी कि

युसफ दाऊद घरानैरा कनै बंशैरा थ्या,गलीलैरै नासरत नगरा सेईतै यहुदिया मझ दाऊदैरै नगरा

बैतलमानी ग्या।

जां सै बैतलम मझ पुजै,तैन्हानी तैड़ी रैहणानी जगा न थी।तेन्हां केवल सै जगा मै जै पशु

रिहीथ्यै।तैस बच्चैरा जन्म तैड़ी भुवा जैड़ी पैशुवा चैरिथ्यै कनै कनै तैसेरी मईनी कौ मन्जा न

थ्या।तैन्है तैसैरू ना यीशु रख्खु।

कनै तैस दैशा मझ कैथरै पुहाल थ्यै, जै राती मैदाना मझ रैही करी अपड़ै झुडा समैईथ्यै, अचानक

अक चमकता स्वर्गदूत हैरा।कनै सै बड़ै डरी ग्यै ।तां स्वर्गदूतै तैन्हांनी बौलु मैई डरा,कैईनी कि

अंऊ तुवानी अक आनन्दैरा समाचार शुणाता,कि आज बैतलम नगरा मझ तुबाड़ै तैईनि अक

उद्धारकर्ता जम्मा,कनै ऐहै मसीस प्रभु आ।

कनै तैसैरा ऐ पता भुणा कि तुऐ ऐकी वालका कपड़ै मझ पलैटौरा पालै कनै घहा मझ प्यौरा

पअलै।तां अक दम स्वर्गदूता कैरा दल परमेश्वरैरी स्तुति काता कनै ऐ बौलतै लद्धै ,आकाशा मझ

परमेश्वरैरी महिमा कनै पृथ्वी पन तैन्हां मैणुआं जैस सेईतै सै खुश आंतै, शांन्ति भुईया।

तां पुहालै बैतलमानी ग्यै जैड़ी यीशुरा जन्म भुआ।कनै तैन्है झट गही करी मरियमा कनै युसफा कनै घहा मझ प्यौरा तक्का,तैन्है तैहिऐ पा जिही स्वर्गदूतै बौलौरू थ्यु तिहै पाऊ।सै बड़ै खुश थ्यै।कनै मरियम बी बड़ी आनन्दित थी,कनै सै पुहाल जिही तैन्हानी बौलौरू थ्यु सै सब सुणी करी कनै तका करीपरमेश्वरैरी महिमा कनै स्तुति कतै नशी ग्यै।

कुछ टैमा बाद जोतिष्यै पुर्वा मझ अक तारा तक्का।तैनी ला तैन्है जाणु कि यहुदिया कैरा नया राजा

पेईदा भुआ ।कनै सै अक बड़ी लम्बी दूरी तैह करी तैस राजै तकांणा ग्यै।सै बैतलमानी ग्यै ,कनै

तैस घरा पुजै जैढी यीशु कनै तैसै मा बब्ब रिहतै थ्यै।

तैन्है तैस घरा मझ पुज्जी करी सै वालक तैसेरी मइ कन हैरा,कनै तैन्है मुहैरै बल्ला गीरी करी

बालकांनी प्रणाम कया।तैन्है यीशुनी वहु मुल्यै उपहार दितै।तां सै घरैनी नटठै।

बाइबिलैरि कहानी मझ :मत्ती  1: लूका2